СОКРАЩЕННАЯ РУССКАЯ ПРАВДА
(по Толстовскому списку второй половины XVII в.)

                                                                    СТР.
                          Правда рускаа                             113
     1. Аще уб(ь)ет муж мужа,  то мстити брату брата,  любо отцу,
любо сыну;  оже ли не будет кто его мстя,  то положити  за голову
80 гривен, любо разсудити по муже смотря.

                          О мужи кроваве
     2. Аще приидет кровавъ муж на двор или синь,  то видока  ему
не искати,  но платити ему продажа за безчестие, каков будет; аще
не будет на нем знамения,  то привести ему видок,  слово  противу
слова.
     3. Аще ж ударит мечем или ножем,  а не на смерть,  то  князю
вины 9 гривен, а исцу за рану судят..
     4. Аще ударит на смерть  жердию  или  попехнет,  а  знамения
нетъ,  а  видок  будет,  аще  будет болярин или людин или варягъ,
крещения не имея,  то по их пути платити безчестие; аще видока не
будетъ, ити имъ на жребии, а виноватыи в продаже, во что обложат.

                           О разбоинице                             114
     5. Будет  стал на разбои,  то разбоиника люди на платят,  то
выдадят его всего со женою и з детми на разграбление.
     6. Аще кто не вложится в дикую веру, тому людие не помогают,
но сам платитъ.

                         О поклепнеи вере
     7. Аще будет на кого поклепъ,  а не будет  послух  7,  то  ж
выведут веру,  любо варягъ или инъ.  А по костех и по мертвеце не
платити веры, аже имени не ведаютъ, ни знаютъ его.

                      О вседении на чуж конь
     8. Аще кто сядет на чуж конь, не прошав, то за то 3 гривны
     9. Аще кто поимается за кон(ь),  или за портъ, или скотину и
наречет:  «се мое»,  но поиди на свод, где еси взял, а что съ ним
погибло, то платити.
     10. Аще коневыи тать,  выдати его князю на потокъ, а клетныи
тать, то 3 гривны платити ему.

                             О купли
     11. Асще что будет татебно купил в торгу, кон(ь), или портъ,
или скотину, то выведет свободна мужа два или мытника; аще начнет
не  знати,  у кого купил,  то ити по нем темъ видоком на роту,  а
исцу свое лицем взяти.

                             О своде
     12. А свода ись своего города в чужу землю нет.

                          О убитии татя                             115
     13. Аще yбиет кого у клети или у которои татбы,  то убити во
пса место,  аже его до света удержит, то вести его на княжь двор,
а буди люди видели связана, а убиют, то платити 12 гривенъ.
     14. Аже  ли  крадет кто скот в хлеве или клеть,  аже еди(нъ)
кралъ, то платити ему 3 гривны и 30 кун, а буди их много, то всем
платити по 3 гривны и по 30 кун.

                         О уроцех скоту
     15. Аще  крадет скот,  за лошади 60 кун,  за вол гривна,  за
корову 40 кунъ, за лонщину полгривны, за теля, за свинию 5 кун.
     16. Аже будут холопи тати,  то суд княжь,  их же князь обиду
платитъ исцу.

                            О поклажеи
     17. Аще кто поклажее кладет у кого, тому послуха нет, но оже
почнет болшим клепати, тому ити роте, у кого лежал товар.

                              О резе
     18. Аще кто дает куны в резы или жито в присопъ,  то послуси
ему ставити; как ся рядил, так ему и имати.

                        О потоплении купца
     19. Аще которыи купец где любо с чужими кунами истопится или
рать возмет, или огнь, то не насилити ему, ни продати его; аже ли
пропиется,  то воля тому,  чьи куны,  ждут или продадут,  своя им
воля.

                             О долзе                                116
     20. Аще кто многим долженъ будет,  а приидет гость изъ ыного
града или чужеземець, не ведая запустит за него товар, и не хочет
гостю  дати  кун,  а  первии должники начнут ему запинати,  тогда
вести его на торгъ и продати и дати преже иноземцу,  а  домашним,
что  ся  останет  и не поделят;  аще за ним будут княжи куны,  то
княжи куны преже имати,  а прочее в делъ;  и кто много реза имал,
тому не имати кун.

                             О бороде
     21. А кто порвет бороду, а возмет знамение, и станут видоки,
то 12 гривенъ продажи; аже без людеи, в поклепе, нету продажи.

                              О зубе
     22. А зуб выб(ь)ют,  кровь у него  видят  во  рте,  а  людие
вылезут, то12 гривенъ продажи, а за зубъ гривна.

                    О бобре и разламании борти
     23. А кто украдет бобръ или сеть,  или разломаетъ борть, или
кто посечет древо на меже,  то по верви искати  татя  в  себе,  а
платити 12 гривенъ продажи.

                        О посечении борти
     24. Аще  борть  посечет кто,  3 гривны продажи,  а за дерево
полгривны.
     25. Аже пчелы выдерет, 3 гривны же.

                            О перевесе                              117
     26. Аще  кто  потнет вервь перевесную,  3 гривны продажи,  а
господину за вервь гривна.
     27. А  украдет  кто  из  ловли  ястреб  или  сокол,  продажи
3 гривны,  а господину гривна; за голуб 9 кун, за утя, за гус, за
жаравль и за лебед 30 кунъ, а за возъ дровъ 2 ногаты.

                             О гумне
     28. Аще кто зазжет гумно, то на поток и на грабеж дом его, а
первее пагуба исплативше;  а кто двор зазжет,  тако же, а в проце
князю поточити и.
     29. Аще кто,  пакости дея,  любо конь зарежет,  или скотину,
продажи 12 гривен, а за пагубу господину урокъ платити.
О послусехъ
     30. Тяжи все судити послухи свободными;  будет послух холоп,
то холопу на правду не стати, но оже хочет истець.

                              О жене
     31. Аще кто убиет жену, темъ же судом судити, яко же и мужа;
аже будет виноватъ, то пол веры, 20 гривен.
     32. А в холопе и въ робе веры нетъ,  но оже без вины  убиет,
то  за  холоп  урокъ  платити,  или  за  рабу,  а князю 12 гривен
продажи.

                        О заднице боярстеи
     33. Аще в боярехъ или во дружене,  за князя задница не идет;
оже не будет ни сынов, а дщери возмут.
     34. Аще ли кто умирая,  а разделит дом свои детем, на том же
стояти; безрядну ли паки умрет, то всем детемъ, а на самого часть
дати души.
     35. Аже ли жена сядет по мужи, то дати на ню часть, а что на   118
ню муж возложит, тому есть госпожа, а задница еи мужня не надобе;
будут ли дети,  то что первые жены,  то возмут дети матери своеи,
любо си на жену будет возложилъ, обаче матере своея и то возмут.
     36. Аже ли будет сестра въ дому,  то задницы еи не имати, но
отдадут ю братья за муж, како си могут.
     37. Аже будут робии дети у мужа,  то задница им не имати, но
свобода им с матерею.
     38. Аже  ли  будут  дети  малы в дому,  а не дюжи сами собою
печаловати,  а мати их поидет за муж,  то кто им  ближнии  будет,
тому дадут на руце з домом донележе возмогут,  а товаръ дати пред
людми;  а что изрезит товаром  темъ  или  пригостит,  то  ему,  а
истовыи  товар имъ;  аже ли от челеди плодъ или от скота,  то все
поимати лицем, а что ростерял, то ему платити.
     39. Аще ж(е) отчим приимет дети со задницею, то тако же есть
ряд. А двор всяко меншему сынови.

                           О холопьстве
     40. Холопьство  обилное  трое:  аж(е)  кто  купит,  хотя  до
полугривны,  а  послухи  поставит,  а  ногату  дастъ  пред  самим
холопом.
     41. А другое холопство: аж поимет рабу без ряду; поимет ли с
рядом, на том и стоит.
     42. А третие холопство: тиунство без ряду или привяжет ключь
к себе без ряду, а с рядою, на чем ся рядил, на томъ и стоит.
     43. А в даче, ни по хлебе не холоп; отидет не виноват есть.
     44. Аж(е)  холоп  бежит,  заповедает  его  господинъ,  аж(е)
слышавъ  кто,  или  зная,  или  ведая  дастъ ему хлеба,  или путь
укажет, то платити ему за холопа 5 гривен, а за рабу 6.
     45. Аже  переиметь  чуж холоп и подастъ весть господину его,
то  переима  ему  гривна;  а не ублюдет холопа,  то  платити  ему
4 гривны, а за рабу 5 гривен.
     46. А кто самъ сведает  своего  холопа  въ  чьем  городе,  а
посадник любо не ведал,  то поведати ему и пояти от него отрокъ и
шедше увязати егои дати ему вяжчего 10 кун,  а переима нету;  аже
ли  за ним гоня застрелит,  то себе ему беда,  а не платити в том
ничего.
     47. Аще  ли  кто не ведая,  чуж холоп сретит и повести деет,
или держит у себя,  а отидет от него,  то ити ему  роте,  яко  не
ведал есмь, что холоп и бегает, а платеж(а) ему в том нету.
     48. А где холоп куны вложит,  а он буди  не  ведая  дал,  то   119
господину выкупати, а ведая дал, кун лишится.
     49. А кто пустит холоп в  торгъ,  а  одолжает,  то  выкупати
господину его или лишитися его.
     50. А  кто  купит,  не  ведая,  чуж(ь)  холоп,  то   первому
господину холоп,  а оному куны имати,  ходивше роте, яко не ведая
купил есмь.
     51. А чии холоп побежит,  а возмет что у соседъ,  то платити
господину чии холоп;  аще ли с ним свободнии крали или  хоронили,
то те князю в продажу.