КРАТКАЯ РУССКАЯ ПРАВДА
(по Академическому списку половины XV в.)

                                                                    СТР.
                          Правда роськая                            75
     1. Оубьеть моужь моужа,  то мьстить братоу брата, или сынови
отца, любо отцю сына, или братоучадоу (а), любо сестриноу сынови;
аще не боудеть кто мьстя,  то 40 гривенъ за голову;  аще  боудеть
роусинъ,  любо гридинъ,  любо коупчина (б),  любо ябетникъ,  любо
мечникъ,  аще (в) изъгои боудеть,  любо словенинъ,  то 40 гривенъ
положити за нь.
     2. Или боудеть кровавъ или синь  надъраженъ,  то  не  искати   76
емоу  видока  человекоу  томоу:  аще  не боудеть на немъ знамениа
никотораго же (а),  то ли (б) приидеть (в) видокъ;  аще ли (г) не
можеть,  тоу (д) томоу конець;  оже ли себе не можеть мьстити, то
взяти емоу за обидоу 3 гривне, а летцю (е) мъзда.
     3. Аще  ли  кто  кого оударить батогомъ,  любо жердью,  любо
пястью,  или чашею,  или рогомъ,  или тылеснию, то 12 гривне; аще
сего не постигнуть, то платити емоу, то тоу конець.
     4. Аще оутнеть мечемъ,  (а) не вынемъ а его, либо роукоятью,
то 12 гривне за обидоу.
     5. Оже ли оутнеть роукоу,  и отпадеть роука, любо оусохнеть,
то 40 гривенъ.  Аще боудеть нога цела или начьнеть храмати, тогда
чада (а) смирять.
     6. Аще  ли  перстъ  оутнеть  которыи  (а) любо,  3 гривны за
обидоу.
     7. А во оусе 12 гривне, а в бороде 12 гривне.
     8. Оже ли кто вынезь (а) мечь,  а не тнеть,  то тъи  гривноу
положить.
     9. Аще  ли  ринеть  моужь моужа любо от себе,  любо к  собе,   77
3 гривне,  а видока два выведеть; или боудеть варягъ или колбягъ,
то на ротоу.
     10. Аще  ли (а) челядинъ съкрыется (б) любо оу варяга,  любо
оу кольбяга, а его за три дни не выведоуть, а познають и в третии
день, то изымати емоу свои челядинъ, а 3 гривне за обидоу.
     11. Аще кто поедеть на  чюжемъ  коне,  не  прошавъ  его,  то
положити 3 гривне.
     12. Аще поиметь кто чюжь конь,  любо ороужие,  любо портъ, а   78
познаеть  въ  своемь  мироу,  то  взята емоу свое,  а 3 гривне за
обидоу.
     13. Аще познаеть кто, не емлеть его, то не рци емоу: мое, нъ
рци емоу тако:  поиди на сводъ, где еси взялъ; или не поидеть, то
пороучника за пять днии.
     14. Аже где възыщеть на  дроузе  проче,  а  он  ся  запирати
почнеть  (а),  то ити ему на изводъ пред 12 человека (б);  да аще
боудеть обидя не вдалъ боудеть (в) достоино емоу свои скотъ, а за
обидоу 3 гривне.
     15. Аще кто челядинъ пояти (а) хощеть,  познавъ свои,  то къ   79
ономоу вести (б),  оу кого то боудеть коупилъ, а тои ся ведеть ко
дроугому, даже доидеть (в) до третьего, то рци третьемоу: вдаи ты
мне свои челядинъ, а ты своего скота ищи при видоце.
     16. Или холопъ оударить свободна  моужа,  а  бежить  (а)  въ
хоромъ,  а  господинъ  начнеть не дати его,  то холопа пояти,  да
платить господинъ за нь  (б)  12  гривне;  а  за  тымъ,  где  его
налезоуть оудареныи тои моужь, да бьють его.
     17. А иже изломить копье,  любо щитъ,  любо портъ, а начнеть
хотети его деръжати оу себе,  то приати скота оу него; а иже есть
изломилъ,  аще ли начнеть приметати,  то скотомъ емоу  заплатити,
колько далъ боудеть на немъ.
     * Правда оуставлена  роуськои  земли,  егда  ся  съвокоупилъ   80
Изяславъ,  Всеволодъ,  Святославъ,  Коснячко,  Перенегъ, Микыфоръ
Кыянинъ, Чюдинъ, Микула.
     18. Аще  оубьють огнищанина (а) въ обидоу,  то платити за нь
(б) 80 гривенъ оубиици (в),  а людемъ не надобе; а въ подъездномъ
(г) княжи 80 гривенъ.
     19. А иже оубьють огнищанина в разбои,  или (а)  оубиица  не
ищоуть (б),  то вирное платити,  в неи же вири (в) голова начнеть
лежати.
     20. Аже оубиють огнищанина оу клети (а), или оу коня, или оу
говяда,  или оу коровье (б) татьбы (в), то оубити въ пса место; а
то (г) же поконъ и тивоуницоу.
     21. А въ княжи тивоуне 80 гривенъ.  А конюхъ старыи оу стада
(а)  80 гривенъ,  яко оуставилъ Изяславъ въ своем конюсе,  его же
оубиле Дорогобоудьци.
     22. А  въ  сельскомъ старосте княжи и в ратаинемъ 12 гривне.
А в рядовници княже 5 гривенъ.
     23. А въ смерде и въ хопе (а) 5 гривенъ.
     24. Аще роба кормилица, любо кормиличицъ 12.                   82
     25. А за княжь конь,  иже тои (а) с пятномъ,  3 гривне; а за
смердеи 2 гривне.
     26. За  кобылоу  60 резанъ,  а за волъ гривноу, а за коровоу
40 резанъ,  а третьякь 15 коунъ, а за лоньщиноу полъ гривне, а за
теля 5 резанъ, за яря ногата, за боранъ ногата.
     27. А оже оуведеть чюжь холопъ,  любо робоу, платити емоу за   83
обидоу 12 гривне (а).
     28. Аще же приидеть кровавъ моужь любо синь,  то  не  искати
ему послоуха.
     29. А иже крадеть любо конь,  любо волы,  или клеть,  да аще
боудеть единъ кралъ,  то гривноу и тридесятъ резанъ платити емоу;
или ихъ будеть 18,  то по три  гривне  и  по  30  резанъ  платити
моужеви.
     30. А въ княже борти 3 гривне, любо пожгоуть любо изоудроуть
(а).
     31. Или  смердъ  оумоучать,  а  безъ княжа слова,  за  обиду
3 гривны.
     32. А въ гнищанине, и в тивоунице, и въ мечници 12 гривъне.
     33. А  иже  (а)  межоу  переореть  либо перетесъ (б),  то за
обидоу 12 гривне.
     34. А оже лодью оукрадеть,  то за лодью платити 30 резанъ, а
продажи 60 резанъ.
     35. А въ голоубе и въ коуряти 9 коунъ.
     36. А  въ оутке,  и въ гоусе,  и  въ  жераве,  и  въ  лебеди   84
30 резанъ; а продажи 60 резанъ.
     37. А оже (а)  оукрадоуть  чюжь  песъ,  любо  ястребъ,  любо
соколъ, то за обидоу 3 гривны.
     38. Аще (а) оубьють татя на своемъ дворе, любо оу клети, или
оу  хлева,  то  тои оубитъ (б);  аще ли до света держать (в),  то
вести его на княжь двор;  а оже ли оубьють,  а люди боудоуть  (г)
видели связанъ, то платити в немь.
     39. Оже (а) сено крадоуть, то 9 коунъ; а въ дровехъ 9 коунъ.
     40. Аже  оукрадоуть  овъцоу  или  козоу,  или свинью,  а ихъ
боудеть 10 одиноу  овьцоу  оукрале,  да  положать  по  60  резанъ
продажи; а хто изималъ, томоу 10 резанъ.
     41. А от гривни (а) мечникоу коуна,  а в десятиноу 15 коунъ,
а  князю  3 гривны;  а от 12 гривноу емъцю 70 коунъ, а в десятину
2 гривне, а князю 10 гривенъ.
     42. А се поклонъ (а) вирныи: вирникоу взяти 7 ведоръ солодоу   85
на неделю,  тъже овенъ любо полотъ,  или две ногате;  а въ средоу
резаноу,  въже  сыры,  в  пятницоу  тако  же;  а хлеба по колькоу
моугоуть ясти,  и пшена; а куръ по двое на день; коне 4 поставити
и соути имъ на ротъ, колько могоуть зобати; а вирникоу 60 гривенъ
и 10 резанъ и 12 веверици;  а переде (б) гривна; или ся пригоди в
говение рьбами (в),  то взяти  за рыбы  7 резанъ;  тъ всехъ коунъ
15 коунъ на неделю,  а борошна колько могоуть изъясти;  до недели
же вироу сбероуть (г) вирници; то ти оурокъ Ярославль.
     43. А се оурокъ мостьниковъ (а): аще помостивше мостъ, взяти
от  дела  ногата,  а от городници ногата;  аще же боудеть ветхаго
моста подтвердити неколико доскъ, или 3, или 4, или 5, то тое же.